الآية انعكست...كما يُقال

الآية انعكست...كما يُقال

لما تحلم وإنت نايم إن سواق المشروع نزل وسابك في
 العربية لوحدك وسط الطريق ،وإنت بحِس المصريين
وشهامتهم تتطوع وتنط مكان السواق بسرعة عشان تتولى
القيادة وإنت أصلاً مش بتعرف تسوق عجلة وتقوم داخل
في 3 عربيات مرة واحدة ...بس أهم شيء إنك أنقذت الموقف

وإنت واللي معاك طلعتوا من غير إصابات...طبعاً دا شيء
عادي جداً كل يوم الواحد بيحلم مليون حلم...لكن لما الحلم
يتحقق تاني يوم الصبح دا يبقى شيء مش طبيعي...

لإن اللي حصل إنه النهاردة الصبح ,,,صاحبتي وقفت تاكسي..

كان صاحب التاكسي راجل عجوز أوي ومش باين من
أصلاً وبيدخن وهو مش فيه نفس أصلاُ...

انا بقى شفت الراجل من هنا وصُعقت...فقلت لصاحبتي:

(إنتي متاكدة إن الراجل دا مش حيموت مننا في الطريق)
طبعاً كلنا ضحكنا وكنا مترددين نركب...لكن حقيقةً
 الراجل صعب علينا وقلنا يللا هو أولى ويا ريته ما صعب
علينا...اللي حصل كالآتي:

دقيقة واحد ولقينا السواق بينام على نفسه...
بينام بينام يعني مش تهريج...يا نهار أزرق..ولحسن حظي
 أنا اللي راكبة جنبه...اعمل ايه؟ بصيت لصحباتي

في الكنبة اللي ورا لقيتهم اخدوا بالهم فعلاً إنه بينام...
وقالولي(صحيييييه يا ندددددى)...............

طبعاً هنا الراجل قلب كل الموازين...لأن الطبيعي إنك
 بتركب المشروع وبتلقي المسؤلية على السواق
وبتنام إنت بقى...ولما بتوصل هو اللي بيصحيك...
لأ وممكن تصعب عليه فيشيلك زي الأم ما بتشيل ابنها
كده...ويوديك في سريرك لكن إن يحصل العكس...
دا اللي ماكنتش أتخيل إني أعيشه فعلاً...

فيه حد ممكن يقول:(ليه احنا مانزلناش من التاكسي
ونفدنا بعمرنا) حقوله :لإننا كنا طالعين فوق كوبري
محرم بيه...يعني لا تراجع ولا استسلام...

صحيح كان قدامنا طريق من اتنين ،،،إما إنه فوق الكوبري
 يتجه يميناً فنلاقي نفسنا بنسبح في الترعة اللي تحت الكوبري
,,,أو إنه يتجه شمالاً فنلبس في الحارة العاكسة ...والنتيجة
في الحاتين معروفة...الموت..أو..الموت..أو الموت

أو جميع ماسبق........

وفعلا تحقق الحلم وتوليت أنا قيادة التاكسي...لإني
 حُمِلت مسؤلية ايقاظه لما يدخل في شهر النوم الجميل...
فكنت عاملة زي جهاز الأمان(ياعمو إصحى..

يا والدي ركز..يا جدي الطريق فاضي)...ولإن الواحد بردو
مش كان ضامن حياته فكان لِزاماً إني أقول الشهادتين
 وأسلم روحي لخالقها...

وصلت عند باب الكلية وأنا في حالة من الضحك الهيستيري
...مش مصدقة إزاي جالي قلب وأمنته على روحي...
بس الجميل بقى وأنا فوق الكوبري تذكرت الحلم...
ففضلت أدور على ال3 عربيات اللي أنا دخلت فيهم في الحلم

لكن...الحمدلله الذي لا يحمد على مكروه سواه.

أخشى ما أخشاه إني أصدق أحلامي بعد كده...يا رب سترك

نظرات مختلسة

نظرات مختلسة

كنت أرقبها من بعيد...حين بدأت تختلس النظر إليه...

كان المسافة بينهما لا تتعدى متراً واحداً...لا أدري

ما الذي جذبها إليه؟

قد تكون وسامته...شعره الأسود...أو قد يكون لا شيء

كلما وقعت عيناه في عينيها...لاذت بالنظر بعيداً

وكأنها لم تكن ترمقه بنظراتها...فيبعد عينيه هو الآخر

ولكني بعد ذلك لاحظت أن غضبها بدأ يزداد

يكاد يكون جزءً من ملامح وجهها البريء

كانت تنظر إلى ما ترتدي هي وما يرتديه

فنظرت أنا أيضاً إليهما لعلي أجد تفسيراً

وكانت المفاجأة أنه يرتدي (تي شيرتاً)

بنفس لون(البلوزة) التي ترتديها هي

ورأيت تعبيرات وجهها تريد أن تصرخ في

 وجهه:ألم تجد لوناً آخراً(جاتك كبة)

لحظات وفارقاني...فقد غادر كل منهما الترام

 بصحبة والدته ,,,,

(دا مشهد شفته في الترام لطفل وطفلة كل منهما كان بصحبة والدته)

أنا كده.....!!!!

أنا كده....!!!

في إحدى المرات ...في طريقنا المعتادمن الشاطبي إلى موقف محرم بيه
أنا واتنين من صديقاتي أوقفنا تاكسي....وكان الحوار:

صاحبتي:موقف محرم بيه ،لو سمحت

السائق:اتفضلوا.......

قبل ما أركب التاكسي كنت كعادتي قد اشتريت واحدة كانز بيبسي وبسكوتات و كده

بتعب أنا أصلي طول اليوم ولازم آكل.....شقيانة انا أصلي

المهم فرحت لما السواق وافق ،وقلت خلاص حركب وافتح الكانز وأكل
وأشرب براحتي بدل وقفة الشارع.....ركبنا التاكسي وركبت أنا جنب الشباك
....رحت فاتحة الكانز والبسكوت ولسه حبتدي آكل ...ويا ريتني مافتحت
الكانز ولا عشمت نفسي بالأكل لإن حصل الآتي:

السواق أولا شكله كان مش ولا بد ...ما علينا من شكله ...احنا لينا انه
يوصلنا وخلاص (مش أكل وبحلقة هوا)......
المهم ،صاحبتي لاحظت إن السواق حيطلع سيجارة ويولها ...يعني حيخنقنا بالدخان 

صاحبتي(بمنتهى الأدب):لو سمحت ممكن تأجل السيجارة بس لحد ما ننزل؟

طبعاً ولأنه كان معلي الكاسيت وعايش سلطان زمانه أو يجوز سامع وبيستهبل

السواق:نعم ، عايزة إيه؟

صاحبتي(لتاني مرة):ممكن تأخل السيجارة لحد ماننزل؟

ويظهر إنه بردو ماسمعش كويس ...معلش نعذره...وعنها وتكرم ووطى الكاسيت

شويه عشان يسمع....

السائق:نعم حضرتك

صاحبتي(وبكل إصرار):ممكن بلاش تدخين لحد ماننزل؟لإني بتعب من الدخان...

ولأني كنت باكل....فلم أشارك في الموضوع ...كنت بتفرج...لإن بؤي
ماكانش فاضي الحقيقة ،لإني كنت باكل ...ولكن صدمني جواب السائق

السائق:لأ، مش ممكن

صاحبتي:ليه كده؟

السائق:أنا كده.....

صاحبتي :يعني إيه؟

السائق:أنا كده.... حدخن لو مش عاجبكوا ...اتفضلوا انزلوا

طبعاً أنا أصبت بصدمة إزاي الراجل دا يكلمنا بالطريقة دي ....معقولة ممكن كده

فما كان من صديقتي إلا أن قالت له : على جنب لو سمحت....نزلنا

وما كان منه إلا أن أذعن لرغبتنا

كل دا كان في خلال خمسة دقائق ،يعني يدوب عدينا الإشارة ولسه بنقول يا هادي

طبعاً ،أنا كنت متضايقة جداً ..
أولاً :بسبب أسلوب الراجل المعفن اللي بيضحي برزقه الحلال 
عشان يعصي ربنا في ماله وفي صحته....

ثانياً:لإنه نزلني بعد ما فتحت الكانز وخلاص بدأت أكل

ودا يعتبر بمثابة تجربة قاسية عليا إن حد يقاطعني وأنا باكل...
آآآآآآآآآآآآآآآآآآآآآآآه...أصل الأكل دا أهم حاجة عندي...صحيح مش بيبان عليا
وزي ما صحباتي بيقولوا (إني زي القطط باكل وبنكر)
بس مش مشكله......الأكل شيء مهم بردو

ثالثاً:لإنه نزلنا بعد ما ركبنا بدقايق.....طيب فرضاً إنه حد مايعرفنيش شافني 

واحنا بننزل كده يقول عليا إيه؟!!!!!!

طبعاً بعد مانزلنا فقد نال نصيبه من الشتائم التي يستحقها بجدارة ...بس بعد
ما مشي بكل تأكيد ماهو مايصحش نشتم الراجل قدامه يعني ولا إيه؟!!!

واللي يعيش ياما يشوف ....واللي يركب تاكسات يشوف أكتر!!!!

أنا و سائق التاكسي

أنا و سائق التاكسي

بعدما انتهيت من راوند الأطفال اليوم وكان ذلك قرابة الساعة الواحدة ظهراً،
وكالعادة بنبقى طالعين من الراوند مش طايقين روحنا وخاصة 
لما نكون واخدين موضوع تقيل زي الcongenital heart diseases 
لأ ولسه لما الدكتور يكون طالب منك واجب،كده تبقى طبلت أوي يعني ...
لأ ومش يرحم...طالب التسعة lesions في تسع ورقات فلوسكاب
وما خفي كان أعظم....
المهم نزلت من المستشفى ، على أمل إني حلاقي أصحابي المخلصين
مستنيين عشان أمشي معاهم لكن للأسف ماخيبوش ظني فيهم أبداً،
ولقيتهم مشيوا (وبقيت أنا لوحدي... أنا لوحدي) ،

المهم اتصلت بيهم فردوا وقالوا انهم حيستنوني في الموقف ،
قلت كويس ..ألحق أركب تاكسي بقى وأحصلهم ...ما كدبتش خبر...
شاورت للتاكسي ، وكان ذلك الحوار:

أنا:موقف محرم بيه، لو سمحت؟

سائق التاكسي:آه اتفضلي..... 

،،،ركبت في الكرسي اللي قدام جنب السواق وياريتني ما ركبت،،،

سائق التاكسي:محرم بيه؟؟؟

أنا (في بالي ...انت عبيط ولاايه؟):أيون الموقف....(والظاهر انها طلعت 
بصوت عالي شوية ماأعرفش ازاي)

السائق:إيه؟ إنتي متنرفزة ليه؟ أنا سمعتك كويس بس بتأكد...
بدل ماأوصلك وترجعي تقولي لأ

أنا:أبداً مفيش ...أعتقدتك ما سمعتش من الأول...

وعشان مايطولش معايا في الكلام وانا مش نقصاه...ضحكتله ضحكة صفرا...

وقلتله :حصل خير

،،،ودورت وشي ناحية الشباك اللي بعشق النظر منه ولكنه أبى إلا إنه يغتت عليا،،

السائق:انتي مسافرة فين ؟البحيرة؟

أنا:(وبنفس الضحكة الصفرا) إن شاء الله 

هو:فين في البحيرة؟

أنا:هو حضرتك تعرف اماكن في البحيرة يعني؟؟

السائق:آه... منين بقى؟

أنا:أنا من .....(وكلي مضض)

هو:أحسن ناس والله

أنا:الله يكرم حضرتك

هو:من عيلة ايه بقى؟؟!!

(في بالي ...إيه ياعم كمان اسم العيلة؟ ...شكلك كده جايبلي عريس ولا إيه؟)

المهم قلت يمكن لما يعرف حيرحمني ويسكت...

أنا:من عيلة كذا......

هو:ماشاء الله ....دا انتوا أعيان البلد ...أنا أعرف إنكوا عيلة كبيرة أوي

أنا (قل أعوذ برب الفلق من عينك...انت حتحسدنا ولا إيه؟):أيون ..هو كده حضرتك

هو(والراجل اعتقدني أعرف كل فروع العيلة  ):عارفة الباشمهندس (حسن........)

أنا(حاسب ياعم انتي فاكرني ايه ؟...موسوعة جينيس....عايزني اعرفلك شخص من 

300 فرع موجودين في العيلة):لأ يا عمو..دا أنا يدوب أعرف والدي-الله يرحمه-
ووالدتي واخواتي بالعافية ....بس إخواتي لإنهم أكبر فعارفين
المليون شخص بتوع العيلة الكريمة

,,,أنا قلت بقى اكيد الراجل اكتفى بالمعلومات دي وخلاص ...مش حيتكلم 
تاني،أتاريه كان يدوب فتح  كلام ...آآآآآآآآآآآآآآآآآآآآآآآآآآآآآآآآه...
وااقلب دماغااااه!!

هو:كلية إيه بقى؟

أنا:(وبنفس الضحكة الصفرا)طب بشري يا عمو

,,,,,,,,,وياريتني قلت ..(معهد فني),,,,كنت وفرت عل نفسي حاجات كتيرة

هو:ماشاء الله ....وناوية تتخصصي إيه بقى إن شاء الله؟

تصدقوا مع إن السؤال يبان في ظاهره سهل ..إلا إنه أصعب سؤال ممكن 

طالب طب يتسأله...لدرجة إني لو دخلت الامتحان من غير ما أذاكر

ممكن أحل الأسئلة وأنجح ...لكن سؤال( حتتخصصي ايه؟)

صعب جداً بالنسبة لي ....المهم قلت أختصر

أنا:والله حضرتك انا مش محددة تخصص بعينه....لكن نفسي أكون 

حد كويس في التخصص اللي مكتوب لي ...عشان ربنا يرضى عني...

.،،،،،،،(وراح مقاطعني)

هو:لألأ...إزاي انتي لازم تكوني محددة حاجة ....نفسك تتخصصي فيها

..دا أكيد،،،،،،،،،(بنبرة حادة وكاني غلطت في البخاري )

أنا:والله حضرتك يعني زي ماتيجي تيجي...أنا لو اتمنيت

حاجة النهاردة بكرة حتمنى حاجة تانية ...لإن لسه المعالم

بالنسبة لي مش واضحة ..وأنا لسه أول شهر ليا أدرس

تخصصات وكده،،،،(وأشياء كثييييييييييييييرة من هذا القبيل ...إنه يرحمني ..أبداً)

هو: لأ... انتي لازم تكوني حددتي ...أطفال ،باطنة،جلدية

.....كده يعني......(وكأن أهل مكة ليسوا أدرى بشعابها)

،،،،،،،،وتبوء كل محاولاتي بالفشل... إني أسكته...مستحيل...

وأنا محدش عمره ضايقني كده قبل كده،،،،،،

المهم تمالكت أعصابي وأنا بدعي وأقول يارب التاكسي يعطل

وينزلني على أي جنب....

أنا:عمو...هو مش حضرتك سواق تاكسي حالياً؟

هو:آه

أنا:لكن أكيد قبل ما تستقر على مهنة السواقة ....اشتغلت في حاجات تانية....

وفي الآخر قلت لأ أنا ما انفعش غيرسواق تاكسي....صح؟!

هو:آه

،،،،،،(الحمدلله ظهر الحق وزهق الباطل ...إن الباطل كان زهقاً)،،،،،

أنا:أهو أنا كده بالظبط يا عمو...لازم أدرس قايمة التخصصات

اللي حضرتك عارفها دي عشان أقدر أقول في الآخر ..

أنا عايزة أكون إيه؟؟وبعدين أنا لسه قدامي عمر على ما أبقى دكتورة؟

هو:إزاي بقى؟ ...انتي مش في كلية طب؟....يبقى لازم حتبقي دكتورة...دا المهم

،،ويبدو إنه اقتنع بكلامي أو حتى تداعى الاقتناع ..ماهو يجوز

بردو زهق مني لإني ماحددتش بالظبط وبالدليل القاطع

المهم انه خلاص حيلخص...

هو:وبتسافري كل يوم؟

أنا:أيون...بسافر كل يوم

هو:ربنا يوفقك وتبقي أحسن دكتورة ....أصل أنا أحب الناس 

المجتهدين واحترمهم أوي

أنا:الله يكرم حضرتك ...ويباركلك،،،،،،،،(وقررت اني أتعمد ما أردش بعدها)

ولسان حالي يقول ...أخيراً ربنا حيرحمني منك ...وخاصة

اننا خلاص أشرفنا على الوصول 

ومديت ايدي جوا الشنطة وطلعت الأجرة ...وأنا بقول لنفسي

وكمان حدفعلك تمن ماصدعتني...الله يسامحك

هو:حمداً لله على السلامة

أنا: الله يسلمك....أتفضل حضرتك (بديلو الأجرة)

هو:خلي والله ..لو مش معاكي أجرة للسفر وكده

أنا:ميرسيه ...ربنا يخليك ...معايا الحمدلله

ياااااااااااااااااااااااااااااه.....الحيا ة احلى بكتير من غير ما يكون

فيها حد يلُك على قلبك في وقت إنت مش طالبة معاك كلام فيه خالص

وصلت لأصحابي بعد ما كنت خلصت ...والحمدلله هم كملوا عليا 

واللي انا متاكدة منه ...إنه السواق جابلي Hypertention(الضغط) وأصحابي

الحمدلله جابولي Diabetes(السكر)